El Coleutivu Ecoloxista d’Avilés denuncia un vertíu nuevu a la ría

Na mañana del miércoles, los avilesinos y visitantes del Centru Niemeyer pudieron comprobar la esistencia d’un vertíu na ría y la presencia de peces muertos. El Coleutivu Ecoloxista d’Avilés denunció esta situación al Seprona y al Gobiernu.
 
“Esti vertíu nuevu apercibíase a l’altura de la pasarela del Centru Niemeyer sobre les 12 hores pa sorpresa de los que pasaben al llau del centru internacional. Los visitantes sorprendíense de la mancha inmensa de productos industriales onde flotaben dellos peces muertos; un espectáculu llamentable nuna ciudá que se quier vender como turística”, señalen dende’l Coleutivu, que sospecha que’l vertíu podría tener orixe nel colector de les bateríes d’Arcelor-Mittal na ciudá. “Cada poco tiempo anúnciennos que desapaecerán estes situaciones, pero por más tiempu que pasa siguen produciéndose con demasiada frecuencia pa vergoña de les autoridaes que lo permiten”, continúen los ecoloxistes.
 
D’igual forma, esta organización quier llamar l’atención sobre l’agravamientu sobre la contaminación na zona que va suponer la construcción del emisariu submarinu, “cuando en cuenta de verter a la ría, onde se-yos ve con mucha frecuencia, fadránlo de manera direuta” al mar. “La misión del emisariu submarinu será la d’esparcir por toles playes y fondos marinos del entornu de Cabu Peñes la porquería que saquen los colectores”, alerten dende’l coleutivu ecoloxista avilesín.