El Coleutivu d’Estudiantes contra la ‘Semana Negra’ pide “contundencia” al rector

Representantes del Coleutivu d’Estudiantes contra la ‘Semana Negra’ reclamaron a Vicente Gotor, “contundencia” contra “la imposición” de la ubicación del festival. Ésti va celebrase nun terrén pegáu a la Escuela de Marina.
 
Esta asociación estudiantil ye contraria a la ubicación de la ‘Semana Negra’ na parcela que ta acondicionándose dende hai dos años en terrenos municipales situaos xunto al campus de Xixón de la Universidá p’acoyer esti certame que reúne tolos años a miles de persones y muéstrase “indignada” pola actuación del Conseyu d’Estudiantes al aceptar l’emplazamientu d’este ferial coles condiciones de que tuviera llugar fuera del calendariu académicu y baxo la vixilancia de les instalaciones universitaries. El coleutivu denunció la vinculación familiar y política de los tres representantes del Conseyu d’Estudiantes que se reunieron esti llunes colos conceyales José María Pérez y José Manuel Sariego y criticó al PP y a les sos mocedaes “por nun ofrecer alternatives” pese a anuncier en delles vegaes la so oposición de la instalación del certame xunto al campus.
 
Vicente Gotor, rector de la Universidá d’Uvieú, refugó la ubicación futura de la ‘Semana Negra’ dende que conociera la noticia de la intención del Conceyu de Xixón de celebrar esti añu’l certame na parcela municipal pegada a la Escuela Superior de Marina Civil tres dos años na playa L’Arbeyal.