El colectivu ecoloxista GREEN alega contra la saca de sable pa la obra d’El Musel

La organización asegura que van estrayese 24 millones de metros cúbicos de sable del fondu del mar, los más d'ellos d'enfrente de les playes de Xixón, pa rellenar los cais del puertu d'El Musel. El colectivu denuncia que nun se presentaren zones alternatives pa furnir de material la obra y asegura que delles de les saques que cuenten facese yá se refugaron nel pasáu.

El grupu conservacionista Grupu de Recuperación y Estudiu de los Espacios Naturales (GREEN) presentó alegaciones contra 5 de les zones d'au cuenta estrayese'l sable preciso pa l'ampliación d'El Musel, la obra civil más grande na historia d'Asturies. No tocante a les zones conseñaes en proyectu como A y B, d'au van salir 13,6 millones de metros cúbicos de materiales, el grupu camienta que pue suponer un dañu mui grave sobre les playes del conceyu de Xixón, mientres que n'otres dos poces de les que cuenta con surniase sable pa la obra y qu'apaecen conseñaes nos proyectos como C y D puen dañase los caladeros de pesca tradicional, al dicir de GREEN. No tocante a la zona E, contra la que tamién s'alega, dizse que causaría un impactu severu nos ecosistemes de la costa al oeste de la Campa Torres, Xivares y el Tranqueru. Ello y la presencia nel llugar del emisariu submarín del Plan de Saneamientu de Xixón abúlta-yos a los ecoloxistes razón abonda como pa descartar dafechu esta zona. El grupu recuerda que la saca d'arena d'esti llugar yá se descartó nel añu 2003 nel plan de dragáu pa rellenar l'ampliación del cai de La Osa.

Otramiente, el grupu conservacionista pide que se propongan alternatives nel proyectu pa estrayer el sable d'otros llugares, proponiendo que s'empleguen los materiales de dragao de los puertos asturianos. GREEN esixe que s'amieste tamién un proyectu pa la recuperación de los caladeros de pesca, que van sufrir un grave dañu, amás de reclamar una entrevista cola dirección ambiental de la obra y pidir que la saca de sable apare los meses que dure la temporada de baños.