El colectivu d'interinos especialistes n'asturianu organízase

El colectivu d'interinos que dende va dellos meses piden l'apertura de la llista d'interinos de llingua asturiana dio ayeri una rueda de prensa col sofitu de la Xunta Pola Defensa de la Llingua pa esponer les sos principales reivindicaciones y los pasos que tan dando na negociación cola alministración autonómica. Pablo Rodríguez Medina y Arancha Prado García-Jove, como representantes d'esti colectivu esplicaron les sos demandes, que se resumen en solicitar pa los interinos de lingua asturiana un tratamientu equivalente al que tienen les demás especialidaes. Ello ye que mientres la lista d'interinos d'asturianu ta escosada pol efectu de l'aumentu de demanda de l'asignatura, l'alministración, en cuenta d'abrir una segunda llista complementaria, valse d'una disposición especial atechada na falta de definición llegal del asturianu como especialidá educativa pa llamar arbitrariamente a mayestros que cubran les necesidaes d'asturianu, según esti colectivu de mayestros, que denuncien amás que en munchos casos llámase pa cubrir places a mayestros que nun tienen conocimientos d'asturianu demostrables y qu'imparten otres asignatures pero que nun tienen horariu completu.

El colectivu de mayestroscríticos cola situación, compuestu por más de 25 persones que tienen los requisitos precisos pa dar clas d'asturianu pero que nun puen acceder a ello y tan n'otres especialidaes, denuncia que l'alministración nun-yos fae casu, dándose'l casu por dos ocasiones de que'l xefe de personal del Principáu Arturo Verano-yos cancelare entrevista con elli. Los sindicatos d'enseñanza tampoco nun atendieron pal casu d'esti colectivu, y asina, según esplicó Arancha Prado, lleven dende'l mes de setiembre esperando rempuesta de les centrales a les que dicen que-yos espusieron el casu, FETE-UXT y SUATEA. El colectivu tien espuestu'l casu a los responsables de l'Academia de la Llingua y la Oficina de Política Llingüística, mientres que pel momentu la única organización que decidió sofitalos foila Xunta pola Defensa de la Llingua.

Pesllada dende va cuatro años, la llista de mayestros d'asturianu en secundaria ta anguaño escosada, y yá nun queda naide por llamar de la mesma pa cubrir plaza nenguna. El procedimientu normal nestos casos ye'l d'abrir una llista nueva, pero Educación fizo una disposición transitoria cola que s'otorga autoridá pa llamar a docentes d'otres llistes. Un grupu de mayestros coles titulaciones precises pa dar asturianu pero que tan dando otres materies o bien en paro reclámen-y a la Conseyería l'apertura de la llista.


La bolsa d'interinos d'asturianu del añu 2000 ye'l documentu pol que se mandaba hasta agora la Conseyería d'Educación cuando precisaba de llamar a un mayestru pa cubrir una plaza d'asturianu, pero al entamu d'esti cursu 2004-2005, yá nun quedaba nadie por llamar ente les aprosimadamente 90 persones qu'iguaben esa llista. Cuando pasa esto mesmo en cualquier otra asignatura, lo normal ye que se convoque un plazu p'apuntase a una bolsa nueva d'interinos na que cada persona pue presentar los sos méritos y que se convierte automáticamente nun documentu públicu pol que se manda la Conseyería pa cubrir les necesidaes de personal que vayan creándose hasta la convocatoria d'unes oposiciones nueves. De fechu, esti mesmu cursu, esi procedimientu de creación de bolses nueves yá se dio dos vegaes, el 8 de payares del 2004 y dempués el 8 de marzu del 2005, afectando a los interinos que ponen asignatures como francés, alemán, llatín, bioloxía y otres munches especialidaes de secundaria, formación profesional y dellos cuerpos de mayestros.

Sicasí, l'asturianu, con tener la so llista escosada, nun recibió'l mesmu tratamientu qu'otres asignatures. El 27 de xunetu del 2004, enantes d'entamar el cursu, la Dirección de Recursos Humanos del Principáu espublizó una resolución pola que s'aprebaben les instrucciones y procedimientos pa la ellaboración de llistes d'interinos. Nesta resolución amestábase una disposición adicional na que s'esplica que "pa cubrir les necesidaes que se xeneren en llingua tradicional bable/asturianu o gallego/asturianu los aspirantes habrán tar inscritos nel Rexistru de Capacitación y formar parte de cualquiera de les llistes de mayestros o de profesores, acordies col nivel educativu en que se dea la necesidá".

Gracies a esta disposición, según espliquen los interinos, la Conseyería sigue ensin abrir una bolsa nueva y llama a persones que tean apuntaes n'otres llistes con tal de que tengan la capacitación y tean daos d'alta nel rexistru de capacitación, anque, según denunciaron ayeri, hai xente que tuvo poniendo clas ensin cumplir con estos requisitos.

Ello nun contenta a esti grupu d'enseñantes que llamenten que la llingua asturiana siga siendo un "casu escepcional" nel sistema educativu asturianu sometida a disposiciones arbitraries y procedimientos que como mínimo, abulten "poco tresparentes" lo que lleva a una situación d'inestabilidá llaboral y namás pue facer qu'empeorar les condiciones del enseñu de l'asignatura.