El colectivu de sofitu a Juan Morales pide vese con Rajoy

Anque'l pasáu fin de selmana'l portavoz del PP en Congresu de los diputaos Eduardo Zaplana daba por fecha la candidatura d'Ovidio Sánchez a la presidencia d'Asturies nes elecciones del 2007, los militantes y simpatizantes del PP que sofiten la candidatura a la presidencia d'Asturies del ex portavoz parlamentariu del PP Juan Morales, nun tan por dase y tan dimpuestos a facer tolos movimientos precisos pa llograr que Morales sía'l candidatu de los populares nel 2007.


Por de pronto, los siguidores de Morales pidieron ayeri una reunión con Mariano Rajoy al traviés d'una carta na qu'afirmen que cuenten con 7.000 firmes de militantes y votantes populares y na qu'espliquen los motivos que-yos lleven a defender la candidatura de Morales como "persona col sofitu y respetu de los ciudadanos". Morales y el grupu que lu sofita camienten que'l partíu ha facé-yos casu en cuantes que nun s'entendería que siguieren l'exemplu del Gobiernu central "qu'ignoró les firmes contra l'estatutu catalán".

Amás d'un weblog personal en que Morales defende los sos argumentos políticos, los sos siguidores tienen tamién disponible esta otra web col "manifiestu de sofitu a Morales" y tamién esta otra na que se dediquen a facer xirigoncia de la persona d'Ovidio Sánchez.