El Club Patín Xixón Solimar principia la OK Lliga’l sábadu recibiendo en Mata-Xove al Bigues i Riells

L'equipu col meyor palmarés del deporte asturianu, el Club Patín Xixón Solimar, principia esti sábadu la lliga regular contra’l Bigues i Rielles. María Fernández ‘Pulgui’ continúa nel bancu d’un equipu que pierde a l'arxentina Luchi Agudo.

Los problemes económicos y la fin del patrociniu de Biesca impidieron a les de La Calzada’l poder retener a Agudo, considerada como una de les meyores xugadores de ḥoquei patinos del mundu, y inclusive punxo’l peligru la so participación na Copa d’Europa, títulu que’l club xixonés consiguió en cuatro ocasiones (2007, 2009, 2010 y 2012). Sicasí, l’esfuerciu de la direutiva y l’apoyu de l’afición permiten al Club Patín Xixón Solimar salir a competir otru añu más na OK Lliga y a enfrentase na eliminatoria d’octavos de final de la máxima competición europea coles bretones del ASTA Nantes.

El debú en lliga del Solimar va tener llugar mañana, a les 19.15 hores, nel pabellón de Mata-Xove contra’l Bigues i Riells, equipu catalán que destaca pol so orde defensivu. La presencia de la moza xugadora ḷḷeniza Marta González ye la principal novedá de la plantiya que la temporada pasada ganó la Copa de la Reina y finó segunda na OK Lliga tres el poderosu Voltregà de la xixonesa Natasha Lee.