El CIS da una ventaya mayor al PSOE con respeuto al PP, que sigue cayendo al igual que Xuníes Podemos

El barómetru de marzu del Centru d’Investigaciones Sociolóxiques (CIS), con encuentes feches del 1 al 11 de marzu, da al PSOE un 31,3 por cientu n’estimación de votu, seis décimes más qu’en febreru, por un 17,9 por cientu del Partido Popular (PP), que cai nueve, mentes que VOX sigue xubiendo y Xuníes Podemos, baxando.

Esti estudiu realizóse enantes de los movimientos producíos nel Gobiernu de la Región de Murcia por Ciudadanos y el PP y, darréu, la convocatoria d’eleiciones na Comunidad de Madrid que lleva a un cambiu de lideralgu en Xuníes Podemos tres la decisión de Pablo Iglesias de dexar l’Executivu estatal pa centrase na política de la so autonomía, cola ministra Yolanda Díaz como más que previsible socesora al frente de la coalición. Unos acontecimientos que, a la llarga, podríen facer variar les preferencies d’una ciudadanía que, según la encuesta, confirma al PSOE como primer fuercia, con un 31,3 por cientu (30,7 por cientu en febreru), y al PP como principal opositor con un 17,9 por cientu (18,8).

VOX, qu’en febreru algamaba un 13,6 por cientu, avérase al PP con un 15 por cientu d’estimación de votu. Mentes, Xuníes Podemos y les sos confluencies baxen del 11,2 al 9,6 por cientu, mui cerca de Ciudadanos, con un 9,5 por cientu (9,3).