El CIS adelanta'l "sí" pa una Constitución Europea que naide conoz

El barómetru del Centru d'Investigaciones Sociolóxiques (CIS) d'ochobre enxerta, xunta les típiques entrugues sobre los problemes qu'esmolecen al ciudadanu mediu, una interesante retafila de cuestiones alredor del referéndum sobre la Constitución Europea, que los ciudadanos vamos votar pa esti mes de febreru.

Los datos del estudiu del CIS nun dexen llugar pa la dulda: el ciudadanu mediu desconoz dafechu'l conteníu y el significáu de la Constitución Europea. Namás el 0,5% de los encuestaos dicen tener un conocimientu "mui altu" de la Constitución y un 8% s'atreven a presumir de tener un conocimientu "altu" de la mesma, mientres qu'un 40,6% reconocen tener conocimientu "baxu" el 18,3% "mui baxu" y un 31,9% dicen directamente que desconocen dafechu la Constitución Europea.

Sicasí, a la hora de dir a votar estos datos d'ignorancia énte la carta magna de la UE tradúcense nuna corriente mayoritaria de participación y al favor del sí nel referéndum. En cuantes a la intención de dir a votar, el 46% de los encuestaos dicen que van dir de xuro, y otru 26,3% dicen que lo más fácil ye que vayan. Namás un 8,5% de los encuestaos tienen bien claro qu'esi día nun van dir a echar la papeleta, y hai cerca del 15% d'indecisos.

Sobre'l sentíu del votu, un 44,6% de los encuestaos adelanten que van votar al favor de la Constitución, un porcentaxe mayor que'l tantu por cientu d'indecisos, que llega al 30.9%. En contra de la constitución namás se pronuncien un 4% de los encuestaos, mientres que pola abstención apuesten el 13,6% y otru 5% votaríen en blanco.

Un datu curiosu ye'l qu'apaez cuando se-yos pregunta a los encuestaos sobre la influyencia nel so votu de los partíos políticos. Un 57% de los encuestaos dicen que, anque'l so partíu políticu de referencia-yos encamentare votar en contra de la Constitución Europea, ellos nun fadríen casu y votaríen a favor. Incluso anque'l so partíu políticu favoritu-yos pidiere l'abstención, el 56% desobedeceríen el mandáu de la so formación política.

L'estudiu del CIS pue vese na web especial que la Conseyería d'Esteriores, Xusticia y Asuntos Europeos tien puesta pa la información de los ciudadanos asturianos énte'l referendum sobre la UE