El circuitu cultural Xacobéu va llevar 14 proyeutos n’asturianu y castellanu a 18 conceyos

|
Programa Xacobéu

El domingu arranca en Bourres con ‘El xuglar del camín’, de Carlos Alba, el circuitu cultural nuevu entituláu Xacobéu. Confórmenlu 14 proyeutos n’asturianu y castellanu que van aportar no que queda d’añu a 18 conceyos pelos que pasen les rutes xacobees.

Música, artes escéniques y videomapping conformen les actividaes d’esta iniciativa, que s’enmarca nel programa ‘Asturies, Cultura en Rede’. L’oxetivu, promocionar l’añu santu compostelanu al traviés de proyeutos venceyaos col Camín de Santiago.

A les 13 hores del domingu na plaza de la ilesia parroquial Santa María, en Bourres (Tinéu), Alba va estrenar el programa Xacobéu con histories, lleendes, cuentos, romances y coples cantes al son del rabel sobre’l Camín Primitivu. Les siguientes tienen como fecha’l 14 d’agostu: un videomapping de Roberto Lorenzo en Castropol sobre los caminos de Santiago n’Asturies y el conciertu ‘Pasu a pasu, músicas del camín’ de la Orquesta Céltica Asturiana en Salas.

Otres munches propuestes van llegar a los conceyos d’A Veiga, Tapia, Sotu’l Barcu, El Franco, Grau, Navia, Siero, Carreño, Villaviciosa, Colunga, Ḷḷena, Pravia, Llanes, Corvera y Mieres. Ente elles tán ‘La muyer nel Camín’, iniciativa d’Anabel Santiago pa divulgar el cancioneru popular de les rutes xacobees al traviés de la óptica femenina y de diferentes xéneros musicales; conciertos d’Eva Tejedor & Les Pandereteres o Alfredo González; y la obra ‘Manín y el primer pelegrín’, d’Escenapache, que narra las aventures d’un mozu escuderu nel viaxe del monarca asturianu Alfonso II el Castu a Santiago de Compostela.

Pa consultar el programa completu de Xacobéu (en castellanu) calque equí.

Contador Estadistiques