El ciclu ‘Ronda per Asturies’ principia esti vienres en Ḷḷuarca

El ciclu d’actuaciones corales qu’entama Caxastur, ‘Ronda per Asturies’, principia esti vienres na Ilesia de Santa Olaya de Ḷḷuarca. El grupu encargáu d’abrir esta actividá ye la uviedina Coral Polifónica Asturiana Cruz de la Victoria.
 
‘Ronda per Asturies’ va tar compuesta por 30 actuaciones d’otros tantos grupos corales asturianos toles fines de selmana dende güei hasta’l 26 de xunu. Les poblaciones que van poder disfrutar d’esta modalidá musical son A Caridá (El Franco), As Figueiras (Castropol), Bárzana (Quirós), Bual, Cangues d’Onís, Cangas del Narcea, Cartavio (Cuaña), Colombres, Colosía (Peñamellera Baxa), Cue (Llanes), Fresnéu (Cabranes), Grau, La Caizuela (Illas), La Vega (Riosa), Les Arriondes, Ḷḷuarca, Lugones, Molleda (Corvera), Muros, Oceñu (Peñamellera Alta), La Puela (Ayande), La Pola Ḷḷena, Rusecu (Sobrescobiu), Samartín de Lluiña (Cuideiru), Samartín d’Ozcos, San Román (Sariegu), Sotu’l Barcu, Tapia, Taramundi y Vilanova d’Ozcos.
 
“El ciclu persigue l’impulsu y promoción de la música coral, modalidá de gran tradición” nel país, amás de “facilitar l’accesu musical” al oriente y occidente d’Asturies, según señalen dende Caxastur. L’actuación que va abrir ‘Ronda per Asturies’ esta tarde en Ḷḷuarca va principiar a les 20.15 hores.