El CGCEE celebra n'Asturies el tercer Plenu d'esti mandatu

El máximu órganu consultivu y asesor del Gobiernu estatal conformáu por representantes de la emigración aconceya per segunda vez nel país con 45 puntos a tratar.

Güei y mañana celébrase n'Asturies el tercer Plenu del octavu mandatu del Consejo General de la Ciudadanía Española en el Exterior (CGCEE). Ayeri aconceyó n'Uviéu la Comisión Permanente xunto al direutor xeneral de Migraciones, Santiago Yerga, y esta mañana la Fundación Archivu d'Indianos-Muséu de la Emigración de Colombres foi sede de l'apertura de les sesiones cola presencia del ministru d'Inclusión, Seguridá Social y Migraciones, José Luis Escrivá, y el presidente d'Asturies, Adrián Barbón.

Son 45 los puntos que se van tratar estes dos xornaes, rescamplando asuntos como "l'ameyoramientu de proteición a les muyeres víctimes de violencia machista nel esterior, facilitando la so asistencia xurídica; la reforma del códigu civil en materia de nacionalidá; la posibilidá de crear una circunscripción esterior; les condiciones d'accesu a la universidá llueu de cursar Bachilleratu nel estranxeru; l'apertura de nueves Aules de Llingua y Cultura Españoles (ALCE); l'incrementu del personal consular; la meyora de les condiciones del PLEX; o la reactivación de los programas d'ayuda a asociaciones", apuntó Violeta Alonso, presidenta del CGCEE, qu'espera que dende les alministraciones se-y dea un impulsu nuevu a les polítiques destinaes a la emigración y que nesi marcu sían teníes en consideración les propuestas que s'aprueben pol Plenu, yá que busquen garantizar los derechos y ameyorar la proteición de la emigración española".

El CGCEE ta formáu por representantes, escoyíos por votación, de los Consejos de Residentes Españoles en el Exterior (CRE) asitiaos en tol mundu, amás de persones designaes poles organizaciones empresariales y sindicales más representatives, y les federaciones d'asociaciones d'españoles. Complétase colos encargaos de diferentes departamentos del ministeriu y direutores xenerales de les autonomíes nel campu de la emigración.

Na semeya, Barbón, nel centru, con Escrivá y Alonso a la so derecha, nuna semeya de familia colos conseyeros a la puerta del Muséu de la Emigración de Colombres.