El CES prende l’alarma sobre los vertíos contaminantes n’Asturies

El Conseyu Económicu y Social d'Asturies presentó ayeri l'informe "Estáu del mediu ambiente n'Asturies 2003". Ente les sos conclusiones más importantes, l'informa llama l'atención sobre la gran cantidá de vertíos tóxicos al mediu ambiente, la falta de redes de saneamientu del agua y pide una medra de la masa forestal p'adaptase a los mandaos del Plan Nacional d'Emisiones de CO2.


El presidente del CES, Nicolás Alvarez, la viceconseyera de Mediu Ambiente y Ordenación del Territoriu Belén Fernández y el sindicalista d'UXT Pedro García, responsable de la Comisión de Trabayu de Desarrollu y Mediu Ambiente, estaya de trabayu del CES qu'ellaboró'l trabayu, foron los encargaos de presentar esti informe que diz que nel añu 2003 rexistráronse 133 casos de filtraciones de máximu nivel contaminante n'Asturies , rescamplando la esistencia de quince escapes de productos contaminantes que supunxeron un total de 8,1 hectómetros cúbicos. Ello nun panorama nel que se dieron 1.109 emisiones al mar que supunxeron un volume de 680 hectómetros cúbicos, siendo'l 69% de les mesmes d'aniciu urbanu y el 15% d'orixe industrial. Anque eses emisiones industriales son les qu'aporten los productos más contaminantes, el CES llama l'atención sobre'l fechu de que namás el 60% de la población asturiana vierte les sos agües residuales a un sistema de depuración. El CES pon un puntu d'atención sobre'l gastu d'agua, que pal exerciciu 2003 xubió 3 llitros per persona y día de media.


No tocante a emisiones a l'atmósfera, el CES rescampla que los asturianos tocamos a 21,9 tonelaes de CO2 por habitante y añu, un númberu que pon a Asturiesa la cabeza d'España. Aceralia ye la responsable del 37,6% d'estes emisiones, viniendo tres d'ella les eleéctriques encabezaes por Hidrocantábrico y Unión Fenosa ydarréu d'elles otres empreses como Ence (papelera de Navia), la cristalera Saint Gobain o Central Llechera - Capsa.

Pela parte de la bolsa de la basura de los ciudadanos d'Asturies, el CES diz qu'Asturies ye responsable de 2,4 por cientu del total de residuos urbanos d'España. En cuantes a lo que se recicla d'ello, Asturies ta a la cabeza del estáu en papel pero mui per detrás d'otres comunidaes n'envases y cascos de vidriu.

Xunta estos datos el CES encamienta facer un apueste por dotar a Asturies de más masa forestal con vistes a cumplir los protocolos d'emisiones contaminantes, facer campañes específiques de sensibilización y polítiques de tresporte y ordenación del territoriu y urbanismu empobinaes a menguar les emisiones d'efectu invernaderu. Nesti sentíu, el CES congráciase de que s'aprebare'l Plan Forestal d'Asturies y porque Asturies tenga un gran tantu por cientu del so teritoriu guardáu por dalgún tipu de reconocimientu mediuambiental.

Na parte positiva, la memoria del CES tamién diz que se rexistra una tendencia de xuba nel númberu d'empreses que cuenten con certificación ambiental n'Asturies y nel gastu en midíes de protección ambiental de les empreses asturianes en xeneral.