El Certame Internacional de Cuentos Curtios Mánfer de la Llera tien segunda edición

Cuenta con dos estayes, asturianu y castellanu, con categoría de mayores y menores d'edá.

La Sociedad La Montera convoca'l II Certame Internacional de Cuentos Curtios Mánfer de la Llera. Hasta'l 30 d'abril pueden presentase trabayos, qu'han tener una estensión mínima de 2 fueyes y una máxima de 10, y son de temática llibre, magar que va estimase que la obra sía espeyu de los valores que guiaron la vida del escritor de Les Cuestes.

Los testos, inéditos, pueden presentase per vía postal indicando'l nome del concursu (cai Leopoldo Fernández Nespral, 29; 33900, Llangréu) o per corréu electrónicu na direición concursorelatos@lamontera.org, según les indicaciones que marquen les bases. Un xuráu escoyíu por La Montera va decidir los ganadores, que van entragase nun actu en xunetu.

La recompensa na estaya de llingua asturiana algama los 1.600 euros en mayores d'edá, y los 400, en menores. En castellanu repártense 800 y 200, de manera respeutiva.

Los vencedores de la primer edición foron Armando Gutiérrez Rodríguez pol so rellatu 'Soplíu' y, en castellanu, José Díaz González pol cuentu 'Vacalloria', mentes qu'en menores ganó la gaditana Lucía Cárdenas por 'Su mejor amigo'.

Na semeya, el ganador Gutiérrez Rodríguez ente Lluís Aique Iglesias, impulsor del concursu, y Ramón d'Andrés, fíu de Mánfer de la Llera.