El Certame Artísticu Lliterariu Suárez Miranda naz pa sensibilizar a los escolinos na prevención

El 12 de xunu del 1987 Corsino Suárez Miranda finaba nun accidente d’helicópteru nos Llagos xunto a otres seis persones y perros de rastréu na busca d’un neñu perdíu. 31 años más tarde la Conseyería d’Educación y Cultura y el SEPA recuérdenlu con un certame artísticu y lliterariu pa escolinos d’Infantil y Primaria.

El tema escoyíu nesta primer edición del Certame Artísticu Lliterariu Corsino Suárez Miranda ye ‘Heroínes y héroes anónimos’, proponiendo ilustrar y, nel so casu, rellatar, una situación d’emerxencia y ayuda a los demás. Na estaya destinada a los alumnos d’Infantil y primeru y segundu de Primaria’l trabayu va consistir na creación d’una obra plástica o dibuxu de manera individual o por pareyes.

Mentes, na categoría destinada al restu de cursos de Primaria habrá de realizar un rellatu breve, con una estensión mínima de 30 pallabres y máxima de 100. Esti trabayu tamién podrá facese de forma individual o por pareyes, y los escolinos tienen la opción d’emplegar tanto la llingua asturiana como la castellana.

Toles obres han de presentase a concursu al traviés de la direición del centru nel que se cursen los estudios enantes del día 30. En cada una de les estayes, los trés meyores trabayos van llevar un diploma y material educativu o informáticu, mentes que’l colexu va recibir un cheque regalu pa la merca de material, amás d’una visita a les instalaciones de Serviciu d’Emerxencies del Principáu d’Asturies (SEPA).

Esti concursu, en memoria del llavianés Suárez Miranda, naz col oxetivu “de sensibilizar al alumnáu d’Infantil y Primaria na prevención y la seguridá nel nuestu entornu, asina como na alquisición d’hábitos d’actuación en materia d’emerxencies”.