El certame Arcadia Vive lleva conciertos y actuaciones a dellos puntos del conceyu de Llaviana

Barredos, Villoria, El Condao y Entrialgo, amás de La Pola, son los llugares de Llaviana que van acoyer conciertos y actuaciones del certame Arcadia Vive. Toles actividaes son de baldre y pal so disfrute con seguranza van instalase parceles con sielles qu'hai qu'acutar y que namái van poder ocupar convivientes.

Na capital del conceyu y Entrialgo, onde se desendolquen ‘Atardeceres musicales’, yá comenzaron les primeres actividaes, qu’esta fin de selmana pasen a Barredos, Villoria y El Condao, onde A Mansalva Producciones s’encarga de la organización. Gascones, Alfredo González, Silvidos y Gemidos y Mbolas son dalgunes de les bandes artistes que van pasar pelos escenarios d’Arcadia Vive, amás d’espectáculos de maxa o ‘Cantares de…, y pa neños’ con Fernando Valle Roso, y pasucais de pareya de gaita y tambor de Gaiteros del Carbón.

Toles actividaes son de baldre y na cartelería de los organizaos por A Mansalva emplégase la llingua asturiana. P’asistir a les actuaciones ye necesario acutar parcela la selmana previa nel CIDAN o al traviés del teléfonu 985.60.25.25 de 10 a 14 hores, cola obligación de que les persones que vayan xuntes sían convivientes.

Los Kordinaos van abrir el vienres en Barredos el certame, Fernando Valle Roso va facelo’l sábadu en Villoria colos sos cantares pa neños y Cum Luade, n’El Condao. Toles actuaciones son a les 20 hores, sacantes la infantil, que va ser al meudía.