El Centru Niemeyer va parar la so actividá ente ochobre y abril

Dende ochobre hasta abril, cuando yá pueda programar actividaes propies, el Centru Niemeyer nun va tener actividá. Asina anunciólo'l secretariu José Luis Rebollo, que confirmó que’l Patronatu va abrir una vía xudicial contra’l Gobiernu.
 
Rebollo esplicó que la Fundación va tomar aiciones llegales pola negativa del conseyeru de Cultura y Deporte, Emilio Marcos Vallaure, d’almitir les modificaciones propuestes pal Patronatu, que yá interpuso un recursu de nulidá contra esa decisión. Ésti nuevu va dir pela vía Contenciosu-alministrativu.
 
La non cesión del usu de los edificios por parte del Gobiernu a la Fundación ocasiona que nun sólo se pare la actividá pelos meses próximos, sinón que se cancelen tamién los eventos programaos pa entós. Esto va ocasionar al centru unas perdes de 600.000 euros ente cancelaciones y indemnizaciones, según indicó Rebollo. L’espectáculo de María Pagés, programáu pal xueves próximu, ye l’últimu previstu.
 
El secretariu ofreció güei la primer rueda de prensa de la Fundación dende que’l 7 de setiembre pasáu’l conseyeru convocase al Patronatu al nun aceptar como presidente a Manolo Díaz y destacase como responsable máximu. Dende entós, sucediéronse les denuncies por parte de miembros de l’Alministración y descalificaciones hacia la programación, según señaló Rebollo, qu’informó que’l llunes remitió al Gobiernu un informe de 31 fueyes nel que s’inclúin tolos requerimientos documentales sobre la xestión del centru que pidieren. Namái nun unviaron la contabilidá de los cuatro años últimos por si, en cualquier momentu, reclamáranla. Sicasí, añadió que “invitamos-yos a venir a la nuesa oficina a consultala”.
 
“Dende ayeri dexamos de facer esfuercios pa comunicanos col Principáu, pero tamos dispuestos al diálogu”, manifestó Rebollo enantes d’asegurar que llamó en delles ocasiones al viceconseyeru de Sector Públicu, Luis de la Vallina, ensin conseguir falar con él. Rebollo sí anició comunicaciones colos grupos parllamentarios na oposición, PSOE, PP y IU-LV, pa conseguir que dalgún lleve a la Xunta Xeneral una propuesta pa que la Fundación rixa por llei “como ocurre col Museo del Prado, el Reina Sofía o n’Asturies, el Belles Artes o la OSPA”.
 
Una financiación del “32 o 33 por cientu” y apoyu popular
 
Na so intervención, el secretariu desmintió unes pallabres de Vallaure que señalaba que la financiación del Gobiernu suponía’l 80 por cientu del total. Según los cálculos de Rebollo, en realidá “será del 32 o 33 por cientu”, pa depués señalar que l’Executivu puso 1.150.000 euros, “de los que 250.000 gastámolos en coses que faltaben nel Centru, asina qu’en realidá lo que pusieron foron 900.000 euros”.
 
Otra manera, más de 300 ciudadanos diéronse güei cita al meudía na plaza de la Casa Conceyu pa manifestar el so sofitu al Centru Niemeyer. La concentración tuvo una duración de cinco minutos, rotos con aplausos y glayíos de 'El Niemeyer ye d’Avilés' o 'Cascos, chorizu'. Munchos asistentes a esta aición convocada por un grupu d’hosteleros de la ciudá, llevaron cartulines colloraes con mensaxes d’apoyu al centru y camisetes. Pal domingu ta programada una protesta nueva, con salida a les 13 hores na plaza del Pescao y llegada al Niemeyer, na que s’espera la participación d’un númberu mayor de persones al ser día festivu.