El centru loxísticu d'Amazon en Bobes abrirá en setiembre

La multinacional estauxunidense de comerciu promete dellos centenares d'emplegos esti mesmu añu en 60 tipos de trabayu diferentes.

Dos años depués de que la constructora entregara la obra, Amazon va dar actividá la so nave loxística nel polígonu de Bobes/Valbona de 175.000 metros cuadraos dividida en cuatro plantes. "El centru robotizáu nuevu comenzará a operar a lo primero de setiembre y l'oxetivu ye llegar a los 1.500 emplegaos fixos nos trés años próximos", 400 nel momentu nel qu'entre en funcionamientu, aseguró Christoph Steck, direutor de Rellaiciones Institucionales d'Amazon pa España y Portugal en Presidencia acompañáu d'Adrián Barbón y del alcalde de Siero, Ángel Antonio García González 'Cepi'.

"Estes persones trabayarán en más de 60 tipos de puestos diferentes, incluyendo responsables financieros, especialistes en teunoloxía, responsables de control de calidá, inxenieros espertos en robótica y responsables encargaos de recoyer, empaquetar y llevar los pidíós a los nuesos veceros", siguió. Prometió que lo fadrán "nun entornu seguru y recibirá con salarios competitivos y beneficios líderes nel sector".

Cepi apuntó que "cuando anunciaron la construcción" de la nave "dixi que yera'l día más feliz siedo alcalde de Siero. Güei posiblemente sía'l segundu más feliz". Tamién refugó los mieos qu'acompañen la instalación de la multinacional pola afeutación al pequeñu comerciu que se dio n'otros llugares asegurando que "Amazon nun ye un peligru, ye una oportunidá".

"Esti anunciu ye una bona muestra de qu'Asturies tien futuru y qu'atrái inversiones. Ye un día mui importante p'Asturies y malo pa los que viven nel pesimismu, na cofradía del llamentu permanente", aseguró pela so parte'l presidente Barbón.

El procesu de seleición, dende yá

Steck avanzó que'l procesu de seleición de trabayadores "va abrir yá na páxina web de Amazon, que se llama amazon.jobs". Abrió tamién la oportunidá de qu'asturianos que trabayen n'otros centros puedan volver al país.

Na semeya, Steck, Barbón y Cepi.