El centru asturianu de Nueva York pide mediu millón pa una sede

El Centru Asturianu de Nueva York pidió-y formalmente al gobiernu asturianu una ayuda de mediu millón d'euros colos que poder facese con una sede nueva na "Gran Mazana".

L'anuncia diola ayeri la presidenta del Centru Asturianu María Gelchie, que s'entrevistó col Conseyeru de Xusticia y Asuntos Esteriores Francisco Javier García Valledor. Amás de presentar el programa d'actos del X aniversariu del Centru, que va celebrase'l 4 de setiembre, Maria Gelchie dio anuncia de la voluntá de la institución de facese con una sede afechisca a les sos dimensiones y capacidaes como organización na gran ciudá de los EEUU, una sede que Gelchie peritó en cerca d'un millón de dólares, de los que los soscios yá lleven recoyíos cerca de 150.000 dólares.

El Conseyeru Valledor nun dio una rempuesta zarrada a la solicitú de Gelchie, y esplicó que, mientres per una parte, les subvenciones del Gobiernu asturianu puen facese cargu de l'ayuda que se precisa, la posibilidá d'abrir la sede y convertila n'oficina empresarial d'Asturies en NY pesen más condicionantes como ye'l fechu de que tea acabante d'abrise la Casa d'Asturies en Bruseles y que tea tamién acabante de mercase l'edificiu nuevu pa la Casa d'Asturies en Madrid, anque ello nun-y quita interés nin atractivu a la posibilidá d'abrir esta sede.

En cuantes a los actos del 4 de Setiembre, estos van contar cola participación del gaiteru Xuacu Amieva. La directiva del Centru, que prepara un homenaxe a les víctimes del 11-S del 2001, pretende que'l gaiteru vuelva a la ciudá'l día 11 pa interpretar los himnos d'Asturies y de los EEUU na "Zona Cero" de Manhattan, llugar au s'asitiaben les torres ximielgues.