El Centru Asturianu de Bilbao quier garrar local propiu

El centru asturianu de Bilbao ta faciendo campaña pa volver a tener sede propia na capital vasca. Nos años 60, el Centru Asturianu de Bilbao yera de los más importantes qu'había, un tiempu d'esplendor nel que más de 500 socios esfrutaben d'unes instalaciones completísimes. Tres años de decadencia y mala xestión, en 1999 la casa asturiana en Bilbao dexó d'esistir y el local quedó en manes del Centru Burgalés. Agora, un garrapiellu de los miembros del centru, que formalmente nunca dexó d'esistir, tan atropando les ayudes necesaries pa que'l Centru vuelva a tener una sede propia. Los trenta socios que de mano se punxeron con ello yá consiguieron atraer a más asturianos y asturianes n'Euskadi, y agora son yá setenta socios los que se recuperaron pa resucitar esti antiguu centru, que yá cuenta con una pequeña ayuda del Gobiernu Vascu. La otra selmana Ana Canteli, secretaria del Centru, vieno a Asturies pa entrevistase colos responsables de la Conseyería d'Asuntos Sociales y del Conseyu de Comunidaes Asturianes, que-y prometieron ayuda, especialmente Carlos Madera, Director Xeneral de Servicios
Sociales, que s'ofreció a mediar pa garrar un local por un primer plazu de cinco años. Ana Canteli esplicó-y a Asturianía que, pela so parte, los socios del Centru ofrecieron-y al Principáu la posibilidá de llevar un puestu sobre Asturies na prósima feria turística Euskovacaciones y de promocionar Asturies como destín turísticu y los productos asturianos n'otres feries que s'organicen p'aquella parte.

Contador Estadistiques