El Caudal va xugase l'ascensu col Haro

L'equipu rioxanu, verdugu del Caudal la temporada pasada, torna a cruzase nel camín d'un equipu asturianu tres eliminar esti domingu al UP Langreo na prórroga.

Con ésti será'l cuartu desplazamientu del Haro a Asturies nos trés años últimos pa xugar la fase d'ascensu a Segunda División B. Hai trés temporaes, l'Unión superaba'l cuadru blanquiprietu por un global de 2-1, mentes que los rioxanos eliminaben al Caudal l'añu pasáu nos penaltis tres un doble 0-0. Nesta ocasión, l'equipu llangreanu nun pudo repetir trunfu y cayó pol valor dobles de los goles fuera de casa al empatar por 2-2 (1-1, na ida).

L'Haro adelantábase pronto, nel minutu 7, con un gol en propia puerta de Pablo Acebal, xugador que se resarciría col tantu del empate nel 52 de penalti. Nesa xugada, los rioxanos quedaben con diez por espulsión de Pirri, pero l'Unión, pese a la so superioridá, nun supo aprovechar esta circunstancia y llegó con empate al final del tiempu reglamentariu.

Yá na prórroga, Michu adelantaba primero a los llocales a los dos minutos, pero l'allegría tresformóse en tristura cuando Óscar Liébana executaba un llibre direutu na prolongación de la primer parte que ponía'l 2-2 definitivu. Los d'Hernán Pérez intentáronlo con too, pero'l club azulgrana va continuar en Tercera División l'añu qu'entra.

Trunfu mierense

El Caudal, pela so parte, cumplió col trámite y ganó 1-0 al Cayón, algamando asina un global de 3-0. Un tantu de Javi Sánchez nel minutu 22 sirvió pa llevase'l trunfu y esperar al resultáu del sortéu. Los d'Iván Ania buscarán la revancha col Haro na eliminatoria definitiva pol ascensu tres caer la temporada pasada de manera dramática nos penaltis, con Pablo Lago nel bancu.

La ida va disputase en La Rioja, n'horariu entovía por confirmar, mentes que'l partíu decisivu va tener l'Hermanos Antuña como sede.