El Caudal complícase l'ascensu al perder 2-0 nel campu del Boiro

|

Xornada prieta pa los equipos asturianos, que sumaron trés derrotes y un empate, el del Marino col Gavá en Miramar a un gol.

Una igualada la de los lluanquinos que supo a derrota al llegar el gol catalán nel tiempu añadíu. Pese a ser el segundu clasificáu del potente grupu del país mediterraneu, el Marino foi mui superior y mereció'l trunfu nel partíu. Pablo Hernández adelantó a los de Blas García, pero Boris Garrós igualó una eliminatoria que sigue abierta visto lo visto en Miramar. La vuelta va celebrase'l sábadu a les 18 hores nel Municipal La Bòbila.

El Caudal, l'únicu equipu asturianu que pue xubir de manera direuta a Segunda División B como campeón de grupu, complicóse enforma l'ascensu al perder col Boiro gallegu tres protagonizar una mala primer parte que finó con ventaya d'un gol pa los gallegos gracies al tantu de Romay. Na segunda parte, el choque cambió de color y los mierenses llevaron les riendes del partíu, anque ensin aciertu, dalgo que sí tuvo'l Boiro, que ponía'l 2-0 definitivu nel tiempu añadíu tres rematar de cabeza Borja una falta llateral. El domingu, a les 18 hores, Mieres ha d'apoyar al equipu confiando nuna remontada que ye posible pol nivel amosáu polos d'Iván Ania esta campaña na Tercera asturiana.

Michu da vida al UP Langreo

Los últimos minutos de partíu sí foron provechosos pal Llangréu, que consiguió anotar un tantu que da posibilidaes en Ganzábal (domingu, 17 hores) a los de la cuenca'l Nalón. Michu punxo'l 2-1 definitivu n'Alcalá de Guadaíra col equipu llocal, que s'adelantó por medio de Rubén Sánchez y Gonzalo al poco de comenzar la segunda parte.

Peor resultáu traxo l'Avilés d'Azpeitia al cayer derrotáu por un gol d'Aramburu nel minutu 55, ensin la posibilidá d'anotar. Los de Pablo Lago tuvieron enfrente a un rival duru nel duelu de terceros clasificaos y tendrán qu'agarrase al Suárez Puerta (domingu, 17 hores) pa tratar de remontar y siguir vivos na carrera pol ascensu a Segunda División B.

Contador Estadistiques