El catalán, llingua vehicular na TV balear

El catalán va ser la llingua vehicular de la futura televisión autonómica de les islles Baleares, que va entamar a emitir l'ún de marzu del 2005, en pasando un periodu de dos meses de prebes. L'anuncia diola la vicepresidenta del Govern Balear, Rosa Estaràs, que presentó l'alcuerdu de consensu al que llegaron el PP y Unió Mallorquina pal desarrollu del Ente. L'alcuerdu espeya que la programación na TV y radio autonómiques mallorquines va ser dafechu en catalán, respetando les particularidaes de les islles y siempre acordies cola Llei de Normalización Llingüística del 1986. El PP quería facer de mano una TV billingüe, pero la negociación con UM llevó a la fin a un apueste pol catalán como llingua vehicular

La futura televisión balear, que va poder vese en Cataluña y na Comunidá Valenciana, va tener un"énfasis especial" na correcta utilización del idioma nos programes informativos y de deportes, que son los que más lleguen a l'audiencia. Pa ello, la TV balear va disponer d'un llibru d'estilu pol que van tener de mandase los periodistes.

Rosa Estaràs esplicó qu'otru de los oxetivos del Ente de Radio y Televisión de Baleares va ser el de la potenciación de la industria audiovisual nel archipiélagu. Pa ser a ello van promocionase llinies de producción industrial audiovisual y tamién al sector del doblaxe, una característica que sorrayó'l representante d'Unió Mallorquina Josep Lliteres, que dixo qu'ún de los puntos propuestos pol so partíu yera'l del desarrollu d'un sector propiu de profesionales del doblaxe, anque mientres esti sector echa a andar pue tirase d'otres soluciones intermedies, casu de los subtítulos.

En cuantes a la programación, xunta los conteníos "estandar" propios d'una TV xeneralista, la canal balear va tener un procuru especial na tresmisión de competiciones de deportes autóctonos y tradicionales de les Baleares. Na programación cultural, va espardese'l trabayu creativu de los artistes y intérpretes de la Comunidá Autónoma, col enfotu de que la canal seya un axente tresmisor y dinamizador de la vida cultural balear. Inclusive nos concursos y programes d'entretenimientu la TV balear va procurar que salgan alantre col trabayu de profesionales de les islles. La canal balear va tener oficines en Mallorca, Menorca y Ibiza y una unidá informativa permanente en Formentera.

Facer paralelismos cola TV asturiana paez inevitable. Nel casu asturianu, los conteníos en llingua asturiana de la canal autonómica entovía son un misteriu que tendrá de desvelar el Conseyu del ente, mientres que na cuestión de la programación, fálase d'una TV que mire más polo cultural y informativo que por facer una TV xeneralista.

Con too y con ello, hai que tener en cuenta la importancia económica d'una comunidá y de la otra a la hora de facer comparances, y tamién tener en cuenta la distinta evolución de la normalización llingüística del catalán nes baleares, onde ye oficial, y del asturianu n'Asturies. Respective al tantu por cientu de programación n'asturianu, l'Estudiu Sociollingüísticu 2.002 del Principáu d'Asturies obliga a camudar la escala del mapa. Asina, el tantu por cientu d'encuestaos que quieren una tv dafechu n'asturianu ye del 5,7% , anque un 24,3% de los encuestaos taríen d'alcuerdu con una tele n'asturianu al 50% y un 6,2% nun quixeren ver programa dengún n'asturianu en TV. Sicasí, el porcentaxe de programación n'asturianu que demanda'l públicu nel 2.002 ye superior al del 1991, cuando se fizo'l primer Estudiu Sociollingüísticu d'Asturies. Respective a esta cuestión, el sociólogu Francisco Llera Ramo, director de les dos encuestes sociollingüístiques d'Asturies, tien dicho que meter d'entrada una programación n'asturianu dafechu diba ser un error, anque fai un apueste por una presencia yá de mano significativa y que vaya creciendo pasín ente pasu.