El casu de la TV galesa

Dientro de la "Escuela de Seronda" qu'organizó el Conseyu de la Mocedá del Principáu d'Asturies baxo'l motivu "venti años d'estatutu" fízose esti domingu un interesante foru sobre la situación de la Llingua Asturiana nos venti años d'autonomía.

Nesta xornada rescampló la participación de la galesa Elin Jones, quien faló nuna mesa sobre'l futuru de la TV asturiana. Elin esplicó-y al públicu asistente'l modelu de la canal de televisión galesa S4C, una cadena que lleva emitiendo dende 1982. Ello ye qu'esta canal, pegoyu nel procesu de recuperación llingüística del galés, tien tamién otra característica importante: el 90% de los programes qu'emite son de producción propio, lo que xeneró estos años en Gales una importante industria del audiovisual que trabaya pa esta tv creando abondos puestos de trabayu, too ello dientro d'un ámbetu d'emisión xeneralista: documentales, teleseries, informativos, debuxos y infantiles, deportes, programes musicales, de bilordios.... too en galés dafechu.