El Cartagena, primer rival del Avilés na fase d’ascensu a Segunda A

Al Avilés tocó-y el que quiciabes yera’l rival más duru posible nel sortéu de les fases de promoción a Segunda A y Segunda B celebráu’l llunes en Las Rozas. El Caudal va xugase la categoría col Atlético B y el Lealtad l’ascensu col Puertollano.

 

Los de Josu Uribe van tener enfrente a la plantiya más completa de los trés posibles –los otros yeren el Toledo y el Lleida Esportiu–, pero esperen siguir el camín del Caudal na temporada pasada, yá que los mierenses eliminaron al ‘Efesé’ na primer ronda pol ascensu a Segunda División A. Amás, el sortéu dio’l factor campu a los avilesinos, qu’esperen salir vivos de Cartagonova pa finiquitar la eliminatoria nel Suárez Puerte. El partíu d’ida va ser el domingu al meudía, detalle que nun-y presta al entrenador xixonés.

 

Cargáu de moral llega’l play-out el Caudal. Tres salvar l’ascensu na xornada cabera gracies al trunfu col Guijuelo (2-1) y la derrota de la Sociedad Deportiva Logroñés n’O Couto (3-0), los de Tomé van xugase la plaza na categoría col Atlético B, con primer partíu en Mieres. Ésti va tener llugar el domingu, a les 18.30 hores, con entrada gratis pa socios oru y de 12 y 15 euros, pa públicu.

 

Los maliayos, a un pasu del ascensu

 

No que se refier al ascensu a Segunda División B, el campeón asturianu va tener enfrente otru güesu, el Puertollano. Equipu de la categoría de plata hai dos temporaes, la Federación descendiólu a Tercera por impagos a los sos xugadores, un fechu qu’obligaría al equipu mineru a pagar lo que debe pa poder dar el saltu de categoría, tal como fixo la Cultural Leonesa esta temporada. Sicasí, el Puertollano ye un equipu competitivu con un apoyu social importante que nun va dar facilidaes a los maliayos. El primer choque va ser el sábadu, a les 19.30 hores, en Castilla.

 

El segundu clasificáu del grupu asturianu, l’Unión Popular de Langreo, tuvo’l que quiciabes ye’l rival más asequible de tolos asturianos, l’aragonés Atlético Monzón, equipu que nun conoz lo que ye xugar na categoría del bronce. El duelu va tener llugar el domingu, a les 17.30 hores, nel Isidro Calderón. Pela so parte, el terceru, l’UC Ceares, va tener qu’afrontar un viaxe llargu hasta Águilas, población murciana pegada a Almería. Herederu del históricu Aguilás Club de Fútbol –desapaecíu nel 2010–, l’Águilas FC ye un conxuntu complicáu pa los de Nacho Cabo, que van tener la ventaya de xugar la vuelta en La Cruz col apoyu de la so animosa afición, que yá prepara viaxe a Murcia. El partíu n’El Rubial, campu más antiguu del fútbol estatal tres El Molinón –data del 1913–, va celebrase’l domingu a les 17 hores.