El CAO va entrevistase en Bruseles col Comisariu de la UE pal multillingüismu

El Conceyu Abiertu pola Oficialidá va denunciar ante la Unión Europa l'actual situación de "discriminación" de la llingua asturiana. Dos representantes d'esta plataforma, Fernando Ornosoa y Xulio Casado, van treslladase a Bruseles el próximu mates pa entrevistase col comisariu européu de Multillingüismu, Leonard Orban, pa entrega-y un informe críticu col contestu actual de "falta de reconocencia de la llingua".

L'alcuentru, que va tener llugar a les 11 de la mañana del próximu día 4, anunciólu ayeri Fernando Ornosa, qu'esplicó como en Bruseles van sentase con cuatro miembros del gabinete d'Orban, Patricia Bigñot, Johan Haggman, Eva Valle y Ann Vanwinsberghe, a los que van entregar un dossier "de denuncia de la situación llingüística que sufre Asturies, la cual consideramos una discriminación al nun reconocese la oficialidá". "Queremos que se trate esti asuntu na UE y queremos qu'Orban s'entere d'ello y que vea que se tan incumpliendo los mandatos de la Carta Europea de les Llingues Rexonales n'Asturies", la cual recuerda que plantega la declaración d'oficiales de toes elles.

Los representantes del CAO tamién quieren convidar a Leonard Orban a "venir a Asturies pa que conoza a toles partes implicaes nel procesu de la llucha pla oficialidá", en referencia a les organizaciones integrantes del CAO, la Xunta pola Defensa de la Llingua, y a los partíos políticos representaos nel Parlamentu Asturianu, ente otros colectivos.

"Queremos que n'Europa s'enteren de que lo que ye un derechu civil, los mesmos partíos que lu apoyen n'otres comunidaes y qu'equí se nieguen a reconocelu" esplicó Ornosa, que calificó de llamentable que'l Comisariu Orban, col que contactaron en setiembre-yos concediera una entrevista en cuestión de dos meses mientres que la FSA niégase a recibir a los representantes de la plataforma.

D'otra manera, Ornosa saludó les últimes declaraciones de representantes del Partíu Popular (concretamente'l diputáu autonómicu Joaquín Aréstegui y l'alcalde d'Uviéu, Gabino de Lorenzo) mostrando'l so interés pola conservación de la llingua y apostando pola busca d'un nuevu marcu llegal. Eso sí, recordó al PP que "agora tien de dar el pasu y apoyar la declaración d'oficialidá". El representante del CAO llamentó pela otra parte les declaraciones de la FSA, espresándose a favor de la protección del idioma pero ensin oficialidá. "Ye un posicionamientu que conduz a los falantes d'asturianu a tener menos derechos que los ciuadanos d'otres comunidaes con llingües propies, o que los ciudadanos d'Asturies falantes de castellán". Ornosa fexo tamién un llamáu a toles organizaciones participantes nel CAO a llevar la so reivindicación pola oficialidá nel sen de la plataforma y coordinase al máximo con ella, en cuantes que se trata d'una plataforma cívica y abierta que favorez pola so estructura el que'l discursu de la oficialidá nun se vea como una reivindicación aislada o partidista.