El CAO prepara una intervención a favor de la oficialidá del asturianu nel Parlamentu Européu

El Conceyu Abiertu pola Oficialidá (CAO) prevé intervenir énte'l parlamentu européu la próxima primavera pa informar a los diputaos de la Unión Europa sobre la situación de la llingua. Asina lo anunció en rueda prensa'l voceru del colectivu, Fernando Ornosa, qu'axunta a más de 250 organizadores firmantes d'un manifiestu a favor de la oficialidá de la llingua asturiana.
Ornosa anunció la intención del CAO de solicitar la so intervención y ve "mui posible" que la mesma se produza tres el conceyu que tuvo esti martes en Bruseles colos responsables de la Comisión Europea de Multillingüismu, encabezaos pol comisariu Leonard Orban, a la qu'entregó dos informes, n'asturianu y n'inglés, sobre la situación de la llingua, ún d'ellos a nivel xeneral (políticu, alministrativu y social) y otru a nivel educativu.


"Tamos ya faciendo xestiones y prevemos que la intervención se produza na primavera del 2008, coincidiendo col momentu central del procesu de reforma del Estatutu d'Autonomía d'Asturies", comentó Ornosa, calculando que'l memsu seya "n'abril". Na declaración parlamentaria, el CAO va denunciar públicamente la "falta d'oficialidá" de la 'llingua', situación cola que'l so voceru entiende que se ta incumpliendo "l'artículu 3 de la Constitución Española".
Ornosa aseguró tamién que los representantes europeos colos que s'aconceyaron, ente ellos Johan Haggan, ún de los máximos responsables del organismu, xunto col comisariu Leonard Orban, "mostráronse sorprendíos" porque n'Asturies nun se declare oficial la llingua asturiana. "Tamién espresaron la so preocupación pola sobrevivencia del idioma ensin la oficialidá", añadió. Según esplicó Ornosa "la comisión nun ye vinculante, pero informáronmos de que puen facer un llamáu d'atención al Gobiernu del Principáu" sobre esti asuntu.
El voceru del CAO aseguró que la Comisón ta estudiando una posible visita a Asturies de Leonard Orban nel 2009, na que "s'entrevistaría colos principales axentes implicaos nesti asuntu", ente los que mencionó a los representantes de los grupos políticos y de l'Alministración, l'Academia de la Llingua o los colectivos implicaos na llucha pola oficialidá. De la mesma manera, adelantó que'l CAO va caltener una "intensa comunicación" cola comisión nel añu 2008, na que van dir "informando de toles nueses actividaes asina como de la sitaución de la llingua".


Según Ornosa, na visita a Bruseles los resposables del CAO pudieron comprobar que "n'Europa hai total desconocencia de la llingua asturiana" nel sentíu de que "nun saben nin qu'existe". Al so xuiciu, esta situación débese a la falta d'oficialildá, porque "sólo ven les llingües que son oficiales, anque seyan minoritaries; les non oficiales son inexistentes". Ornosa criticó'l fechu de que "por parte del Gobiernu asturianu se promocione la llingua asturiana n'Asturies, pero nun haya nengún tipu de publicidá fuera, motivu pol cual existe un altu grau de desconocencia".