El CAO denuncia que la FSA-PSOE nun respuende a les sos solicitúes d’entrevista

Representantes del Conceyu Abiertu Pola Oficialidá (CAO) tuvieron estos díes entrevistes con dirixentes de la formación política Bloque por Asturies y col Grupu Parlamentariu d'IX-BA na Xunta Xeneral.

Les entrevistes que tuvieron llugar los últimos díes inxértense dientro de les rondes de contactu que la plataforma fai davezu colos grupos políticos, anque'l voceru del CAO Fernando Ornosa denunció a Asturies.com el fechu de que los dos partíos mayoritarios n'Asturies lleven tiempu ensin atender les solicitúes d'entrevista que-yos lleguen de parte d'esta plataforma qu'axunta a más de cien organizaciones. Si nel casu del PP entovía existe un contactu telefónicu ocasional, nel casu del PSOE nun hai contactu nengún,y dende'l CAO aseguren que lo mesmo'l Grupu Parlamentariu socialista que la mesma FSA lleven meses ensin dar rempuesta a les cartes y escritos presentaos en rexistru pola plataforma. Nesti sentíu, ún de de los oxetivos de la entrevista col Grupu Parlamentariu d'IX-BA foi'l de pidir que faiga de ponte pa recuperar el contactu con PSOE y PP.


Pela parte de la reunión col Grupu Parlamentariu d'IX-BA na Xunta Xeneral, la diputada Paloma Uría manifestó la posibilidá de que dende'l CAO "se ficiere una mayor presión na cai y na sociedá pa poder forzar la situación a nivel políticu" y asina dar un reblagu al favor de la oficialidá. Los representantes del CAO retrucaron a la diputada qu'esta presión yá ta faciéndose, y que diba ser más intensa, pero reclamaron pela so parte "más presión dende'l planu políticu" al grupu d'IX-BA y "que sían los mesmos parlamentarios y conseyeros d'esta formación los que falen de la necesidá d'oficialidá en toles ocasiones que se-yos presenten" encamentando qu'amás esa presión y esi discursu s'empobinen "pel terrén de la defensa de los derechos humanos".


No tocante a la reunión col Bloque por Asturies, dende'l CAO calificóse como de "mui cordial" por ser esta "una organización que ta nel CAO y que sigue dafechu la llinia de la plataforma". Na reunión los representantes del CAO y del BA trataron la posibilidá d'entamar una "moción estándar" pa presentala en conceyos onde'l BA tenga conceyales con vistes a que los conceyos se posicionen al favor de la oficialidá. Rafael Dende'l BA pela so parte, garantizóse-y al CAO que la so permanencia en gobiernu va terminar si se firma un estatutu ensin oficialidá y que nun cuenten con gobernar nel futuru con partíos que roblen una reforma que nun recueya la oficialidá. Pela parte del CAO pidióse-y a Rafael Palacios que la so organización tuviere "mas presencia nos medios pa retrucar delles opiniones y declaraciones que se faen en contra de la llingua".