El CAO convoca una xunta estraordinaria esta tarde

El Conceyu Abiertu pola Oficialidá, asociación de la que ye parte la Xunta pola Defensa de la Llingua Asturiana, y qu'agrupa a diverses organizaciones polítiques, xuveniles, sociales y culturales, xuntes nel oxetivu común de llograr la oficialidá de la Llingua Asturiana, va celebrar esta tarde a les 7 nel Auditoriu Prínxipe Felipe d'Uviéu una xunta extraordinaria pa presentar a los medios de comunicación, y a la sociedá en xeneral, el material, estructura y lema de la manifestación que'l 5 de marzu va salir a les 12 y media de la mañana dende la estación de la RENFE d'Uviéu en demanda de l'enxertamientu de la oficialidá na reforma estatutaria.

Dende la organización de la manifestación sorráyase'l fechu de que nesti conceyu van tar disponibles los carteles, pegatines y el restu'l material promocional pa esta convocatoria que los organizadores cuenten con que sía "histórica" sirviendo al mesmu tiempu la convocatoria d'esta tarde como rueda de prensa y como xunta estraordinaria pa rematar detalles con vistes a la convocatoria. Por de pronto, nos últimos díes l'esfuerzu propagandísticu con vistes a la manifestación ta multiplicándose y asina ye que los responsables del CAO yá lleven distribuyíos más de 5.000 carteles per toa Asturies.