El CAO convoca una manifestación pal 5 de payares

El movimientu de revindicación llingüísticu da anuncia d'una seronda caliente. Ello ye que'l Conceyu Abiertu pola Oficialidá convoca una manifestación pal próximu 5 de payares peles cais d'Uviéu. Pela la so parte, la Xunta pola Defensa de la Llingua tamién anuncia una seronda mui activa nel so trabayu de revindicación.

Les principales cabeces del movimientu de revindicación llingüísticu yá tienen diseñáu'l so plan de trabayu pa los próximos meses. Asina -según informen fontes del CAO a Asturies.com- el Conceyu Abiertu pola Oficialidá, plataforma qu'axunta a más de 100 asociaciones y entidaes baxo la bandera de la inclusión de la oficialidá del asturianu na próxima reforma del estatutu, va entamar una manifestación el próximu 5 de payares, que va salir a les 13:00 hores de la estación del norte n'Uviéu. Esta manifestación plantégase como la xera más importante a desenvolver a lo llargo d'esta seronda. Dende'l CAO quieren que sirva p'amosar que l'asturianu "si tien una demanda y respaldu social que dende dalgunos sectores se-y quier negar. Amás, nel CAO l'éxitu de la manifestación anterior el 5 de marzu anímanos a siguir con esti tipu de movilizaciones". Con too y con ello, el Conceyu nun escaez otres xeres, como ye la d'afalagar el diálogu al rodiu de la cuestión llingüística entrevistándose con entidaes de too tipu, y principalmente colos partíos políticos que tienen representación parlamentaria.

Otra manera, la Xunta Pola Defensa de la Llingua Asturiana tamién tien per delantre una seronda con dellos frentes abiertos. Fontes de la Xunta tamién informen a Asturies.com de que "vamos siguir trabayando pelos caminos que yá tenemos abiertos, como ye por poner un casu'l recursu a la convocatoria d'emplegu nel ente de comunicación del Principáu, acciones revindicatives puntuales, y mui importante, siguir trabayando dientro'l del CAO con un sofitu decidíu a la manifestación del próximu 5 de payares". Amás, Xunta Moza
-estaya de mocedá de la Xunta- tamién ta preparando "movilizaciones importantes" pa esta seronda, sobre too no que cinca a la cuestión de l'asturianu na educación.