El CAO calez motores con vistes a la manifestación del 5 de payares

El Conceyu Abiertu Pola Oficialidá (CAO), plataforma na que participen más de cien colectivos y grupos en defensa de la oficialidá del asturianu, prepara pal 5 de payares una segunda gran manifestación dempués de la que'l pasaáu 5 de marzu llevó a más de 5.000 persones en defensa del asturianu peles cais d'Uviéu. Pa dar a conocer más detalles sobre la mesma y esparder la convocatoria a tolos grupos y persones interesaos, el CAO convoca pa esti sábadu a les 12 del mediudía en Palaciu de Congresos "Príncipe Felipe" d'Uviéu una asamblea abierta estraordinaria pa la que se convida a asistir a tolos grupos y persones interesaos. Nesta xunta va facese un repasu al llabor del CAO dende la manifestación del 5 de marzu y va dase información sobre l'estáu en que ta'l procesu de de negociación del documentu "Una propuesta de diálogu pa salvar la llingua asturiana" un documentu de mínimos col que'l CAO quier facer mesa conxunta con tolos partíos políticos representaos na Xunta Xeneral pa debatir la entrada de la oficialidá na reforma estatutaria y que yá se-yos presentó a PSOE, PP y IX-BA.