El CAO acusa a Víctor García de la Concha de "Inorancia premeditada"

El Conceyu Abiertu pola Oficialidá calificó de "inalmisibles" les declaraciones del presidente de la Real Academia Española de la Lengua Víctor García de la Concha, que defendió nun actu en Salamanca esti llunes a "les cuatro llingües d'España" en referencia a vascu, catalán, gallegu y castellanu, como un patrimoniu de tolos españoles, ensin facer referencia a l'asturianu.

El representante del Conceyu Abiertu pola Oficialidá Fernando Ornosa retrucó a les palabres del filólogu asturianu afirmando qu'estes declaraciones amás de ser "inalmisibles" por nun facer referencia al asturianu y ello "sobremanera si tamos falando d'unes declaraciones que tan feches nun contestu cultural, non nun contestu políticu nel que si podría entendese que s'estremare ente llingües oficiales y non oficiales". L'ausencia del asturianu nes pallabres de Víctor García de la Concha lleven al representante del CAO a entrugase "si l'asturianu nun ye un patrimoniu de tolos españoles como les demás llingües". Fernando Ornosa tamién amestó que "l'afirmar qu'esiste un billingüismu real nel estáu como fexo de la Concha nun ye aplicable a Asturies onde sí que podemos falar d'esa diglosia que vien de la posición de dominiu del castellanu y que'l mesmu pretendía negar" mereciéndo-y en conxuntu les declaraciones de Víctor García de la Concha al representante del CAO la impresión de que son el productu d'una "inorancia premeditada".