El campu asturianu tamién peligra cola crisis de la UE

El sindicatu agrícola COAG-Asturies apuntó ayeri la posibilidá de que'l réxime d'ayudes a l'actividá agrícola y ganadera puea sufrir cambeos grandes que, en cualquier casu, dañaríen al campu asturianu. Énte l'anuncia que ficieren los xefes d'estáu de la Unión Europea de que la política agraria comunitaria (PAC) pue ser una de les afectaes pol fracasu del últimu cume de la UE, el sindicatu que dirixe Marino Fernández prende la lluz de l'alarma.

La propuesta que suxeren los miembros de la UE pasa por menguar l'importe de les ayudes de la PAC nel periodu 2007 - 2013 y qu'estes ayudes pasen a cofinanciales los estaos miembros. Según el sindicatu agrícola nel casu del Estáu Español, esta mengua podría ser del 30%, que se reparten ente un 20% de rebaxa que yá venía na primer propuesta de la Comisión más otru 8-9% que nel meyor de los casos tendría de cofinanciar l'Estáu Español acordies cola última propuesta de la presidencia y que nel peor sedría tamién una rebaxa sobre les ayudes actuales. Sobre esto, Marino Fernández alvierte que la cofinanciaciónye una midida con trampa en cuantes que los estaos más probes de la UE nun van tener capacidá pa facela efectiva.

El sindicatu COAG-Asturies diz que s'opón a esta posibilidá de mengua presupuestaria y esixe-yos tanto al Gobiernu español como al asturianu "que se tomen mui en serio" y aguanten una posición de fuerza nesti capítulu en cuantes que'l sector agrariu y el mundu rural representen un tantu por cientu importante del nuestru territoriu. Pal sindicatu que dirixe Marino Fernández la propuesta de la UE supón un riesgu mayor de pieslle d'esplotaciones ganaderes n'Asturies. El sindicatu refuerza la so argumentación a artículu de que l'agricultura ye un sector vital pa la sociedá en cuantes qu'asegura la producción diversificao d'alimentos de calidá a precios razonables, frena'l despoblamientu de los medios rurales y fai pol caltenimientu del mediu ambiente.