El calor pudo dañar a los calamares xigantes

La muerte esti veranu de dellos calamares
xigantes na costa asturiana punxo nel disparaderu al barcu científicu
"Hespérides" que taba faciendo delles mediciones con un
sistema d'ondes d'aire comprimío a alta presión. Luis Laria,
director del Cepesma, vio nes prebes del "Hespérides" la causa de la muerte de los calamares, qu'alloriaríen por culpa de los cañones d'aire, xubiendo a superficie tan apriesa que la descompresión arreventaríalos enteros.

Ensin qu'esta teoría tea confirmada, pero tampoco descartada, con motivu de la visita esta selmana del barcu del
Ministeriu d'Agricultura y Pesca "Vizconde de Eza" qu'equipa sistemes asemeyaos a los del Hespéerides (anque non el cañón d'aire comprimío) Asturies.com pudimos falar cola científica Araceli Muñoz,
que trabaya a bordu d'esti barcu que fizo una campaña d'estudiu de los recursos d'el caladeru d'El
Cachuchu, na vertical de Ribeseya. Entrugada poles muertes de los calamares, Araceli Muñoz dixo que nun conocía les sos causes, pero sí apuntó como posible circunstancia rellacionada l'aumentu de temperatura nel agua. Según Araceli Muñoz, anque la temperatura del agua na superficie del
Cantábricu baxó esti miércoles pa ponese sobre 15,5 C, hasta la otra selmana
tuvo cásique tol tiempu penriba de los 20 C, demasiao pa esti
tiempu del añu y pa esta parte del mundu y abondo como p'afectar a estos animales tan sensibles.