El cable que nun quier llegar

Les cuenques mineres tan aguardando por que la empresa Telecable lleve los sos servicios hasta Llangréu y Mieres. L'alxudicataria de la rede de cable de freba óptico n'Asturies tendría que tener yá tirada dende va un añu la infraestructura básica nestos conceyos, que yá pidieron a Telecable que metiere priesa a últimos del 2001. Pa esta xera la que la filial d'Hidroeléctrica que preside Roberto Paraja tien concedíes amás importantes subvenciones, que lleguen a los 1.000 millones de pesetes. De momentu nun hai fecha puesta pa que'l serviciu de cable llegue a les cuenques, pero la esistencia de fondos públicos pa facer la obra val pa remembrar un asuntu del que se faló poco n'Asturies como foi l'espolín que se montó va tres años, cuando los 511 millones de pesetes en subvenciones con cargu a los fondos mineros que se-y pagaron a Telecable pa tirar la rede n'Uviéu, Xixón y Avilés,onde funciona agora'l serviciu, acabaron llegando al Senáu y dieron pa especulaciones polítiques de toa triba nun momentu nel que los escándalos rellacionaos col ministru Josep Piqué, del que l'escándalu Telecable foi ún más d'ellos, salíen en periódicu tolos díes.