El cable llega a Mieres

La operadora asturiana de cable entama l'añu entrando nes cuenques mineres, una llegada tantes vegaes anunciada y que nun acababa de convertise en realidá anque'l tueru principal de freba óptico, que trescurre pela mediana de l'autovía minera, llevaba puestu bien de tiempu.

Ello ye que dende güei 700 viviendes de Mieres nes que viven cerca de 2800 vecinos entamen güei a recibir a los operarios que los conecten al serviciu de la operadora de cable asturiana, que da asina un primer pasu dientro de la campaña del 2005 d'espardimientu de la so rede. Anque nun quieren pillase col tema de los plazos, Telecable cuenta con siguir cableando más viviendes en Mieres, onde tien una oficina p'atender a los sos nuevos clientes. Llangréu ye un segundu oxetivu a curtiu plazu pa la empresa, qu'en poques selmanes va furnir serviciu a los sos primeros clientes nel conceyu. Ello dempués d'un 2004 en que la empresa entamó a poner llinies en conceyu Siero, onde los vecinos de Llugones yá tienen cable y onde van tenelu d'equí a poco los de la Fresnera. La capital del conceyu va tener qu'esperar más, anque la canal de triple tubu pela que tien de dir la freba óptico yá lleva tamién tiempu puesta na Pola.

Telecable quier facer un esfuerzu grande por llevar el cable a cuantes más puertes meyor d'equí al branu, cuando la empresa de telecomunicaciones llanza'l mercáu les sos meyores ufiertes con motivu de la Feria de Muestres de Xixón y atropa más clientes. De cualquier manera, los servicios de la operadora tan alcontrando una aceptación mui grande en tolos llugares nuevos onde van llegando, como ye'l casu de Llugones, onde más d'un 40% de les viviendes cableaes contrataron el serviciu y onde la media de servicios contrataos llega al índiz 2,4 sobre 3, ello ye, qu'una gran mayoría de los abonaos apúntense a los 3 servicios qu'apurre Telecable, internet, TV y telefonía.