El buscador más grande nun da abastu

Google, el buscador más potente de la rede, podría tar a puntu d'estragar. Rúxese pela rede que Google, el buscador qu'acabó con tola competencia y que yá lleva tres años como amu y señor de la rede, tien por cuestiones de programación, un tope de páxines rexistraes del que nun pue pasar. Esi númberu de páxines sedría de 4.294.967.296, munches, pero menos de lo que tien agora la rede, colo qu'una parte importante de la internet taría quedando fuera de lo que Google ye a albarcar.

Pa más aquello, les páxines que quedaren fuera del Google seríen precisamente les más nueves, mientres que'l buscador seguiría enseñando direcciones vieyes, delles fuera de serviciu. L'alarma sobre Google saltó cuando dellos especialistes analizaron l'actualización que fai Google tolos meses de la base de datos sobre la que trabaya y decatáronse de que faltaben direcciones y de que los resultaos apaecíen dacuando tracamundiaos y poníen en primer llugar -esto ye, como resultáu preferencial- páxines que yá nun funcionaben.