El BOPA espubliza los primeros topónimos oficiales

El Boletín Oficial del Principáu d'Asturies del pasáu vienres asoleya los espedientes toponímicos oficiales de los conceyos d'El Franco, Carreño y Llanes, los primeros qu'aprebó la Xunta de Toponimia y que recibieron el preste del Conseyu de Gobiernu'l pasáu 21 d'abril. Con esti pasu, el llistáu de topónimos pasa a ser oficial a tolos efectos, anque, como comentare nel so día'l Director de Política Llingüística Ramón d'Andrés, la oficialización de los topónimos ha d'acompañase de la so aplicación, que d'Andrés diz que va facese al traviés d'un procesu paulatín "cosa pa la que contamos con acciones del Plan de Normalización y con campañes informatives a los conceyos". Dende política Llingüística cuenten con qu'amás de que los topónimos sían oficiales a nivel autonómicu, inxiriéndose na retulación de carreteres, documentos alministrativos y mapes oficiales del Principáu, esta toponimia tenga algame estatal cola retulación colos topónimos nuevos nes carreteres y instancies titularidá del estáu central.
Carreño, El Franco y Llanes