El BOPA asoleya los decretos toponímicos de Sariegu, Cabranes, Villaviciosa y Bimenes

El Boletín Oficial del Principáu d'Asturies (BOPA) del pasáu vienres 2 d'avientu asoleya los decretos toponímicos de los conceyos de Sariegu, Cabranes, Villaviciosa y Bimenes, los cuatro últimos que pasaron hasta agora'l trámite definitivu pa la so aprobación en Conseyu de Gobiernu.

La publicación d'estos cuatro decretos, ente los que ta'l de Bimenes, conceyu pioneru na normalización del asturianu al decretar la oficialidá de la llingua nel añu 1997, llega mientres la Xunta de Toponimia, órganu asesor de la Conseyería de Cultura na materia, ta rematando un final d'añu intensivu, celebrando a lo llargo de les últimos díes sesiones de trabayu nos conceyos de Ribedeva, Amieva y Grau, y ello mientres qu'otros conceyos siguen picando a la puerta de la Xunta de Toponimia pa solicitar la revisión de los sos nomes de llugar y asina axustalos a les formes tradicionales asturianes. Los dos últimos n'encargar los sos espedientes toponímicos foron los conceyos occidentales de Grandas de Salime y Pezós. El director de la Oficina de Política Llingüística y máximu responsable de la Xunta de Toponimia Ramón d'Andrés cuenta con qu'enantes de rematar el 2005 puea pasar per Conseyu de Gobiernu otra tanda d'espedientes toponímicos compuesta polos conceyos d'Ayer, Nava y Colunga.