El BNG pide que puean amestase a Galicia conceyos d’Asturies

El Bloque Nacionalista Gallegu (BNG) plantega na so propuesta de reforma estatutaria pa la comunidá gallega que los conceyos d'otres comunidaes autónomes qu'atiesten con Galicia puean solicitar l'amestase a la Comunidá Autónoma Gallega, una midida que recupera l'articuláu del estatutu d'autonomía gallegu del 1936.

La propuesta de reforma del Estatutu de Galicia que plantega'l Bloque Nacionalista Gallegu (BNG) y que yá tien el preste del Conseyu Políticu de la Organización, que lu aprobó'l pasaú día 26 de payares por mayoría absoluta, apauta nuna de les sos disposiciones transitories que "Podrán enxertase a Galicia aquellos conceyos que faigan llende con ella y que tengan característiques históriques, culturales, económiques y xeográfiques análogues, al traviés de procedimientos democráticos qu'han regulase pola llei". Esta fórmula recupera la del proyectu d'estatutu d'autonomía gallegu del 1936, que se torgó a los pocos díes d'aprobase por culpa de la Guerra Civil y que recoyía nel so artículu 2 una fórmula equivalente a esta qu'agora recupera'l BNG. De salir alantre, la disposición que propón el BNG nun sedría tampoco privativa del estatutu gallegu nin sedría la primer vegada que se propón dalgo asina. Aragón tien nel so estatutu un artículu redactáu nestos mesmos términos, mientres que'l del Pais Vascu prevé la incorporación de Navarra y del Condáu de Treviño.

El proyectu estatutariu del Bloque Nacionalista contempla tamién otres midíes qu'afecten a les comunidaes autónomes asitiaes na contornada de Galicia, afirmando n'otra disposición transitoria que'l Parlamentu de la Xunta ha reclamá-yos a los parlamentos de les comunidaes autónomes con "comarques de fala gallega" y que faen llende con Galicia la cooficialidá del gallegu. Otramiente l'artículáu del estatutu que propón el BNG tamién contempla que la comunidá autónoma faiga por proyectar el gallegu fuera de les sos llendes.