El Bloque refuga la decisión del ministeriu de retrasar los pagos d’obres feches con fondos mineros

Rafael Palacios, voceru del Bloque por Asturies, esixe una rempuesta firme a los conceyos y al Gobiernu tres la decisión d’Industria de retrasar los pagos d’obres feches con fondos mineros. Pa Palacios, trátase de “una declaración de guerra”.
 
“Énte l’anunciu fechu pol Ministeriu d’Industria, que señala que nun van abonase les cuantíes correspondientes a bona parte de les obres de les anualidaes 2006, 2007, 2008 y 2009; que van retrasase, nel meyor de los casos, hasta l’añu 2012; y que los conceyos namái van cobrar los proyeutos yá executaos, mentes que van dexase de percibir los porcentaxes correspondientes de les obres entamaes, el voceru del Bloque por Asturies, Rafael Palacios, manifiesta’l so refugu a tales intenciones”, señalen dende la formación nacionalista nun comunicáu de prensa. Palacios recuerda que munchos conceyos, en situaciones financieres delicaes, van a tener dificultaes grandes de cumplise esta decisión del Gobiernu estatal. Inclusive, dalgunos ayuntamientos solicitaro creitos al contar coles perres prometíes por Industria pa esti mes.
 
“Con esta decisión nun se sabe qué pasará coles obras yá entamaes y llicitaes. Debemos tener en cuenta qu’hai empreses pel mediu que si nun se les paga pueden llegar a situaciones complicaes, cola consiguiente repercusión nel emplegu”, puntualiza Palacios, que tamién ye candidatu de la coalición Bloque por Asturies-Unidá Nacionalista Asturiana a les eleiciones. “Esta decisión supón un ataque frontal y una verdadera declaración de guerra per parte del Gobiernu del PSOE contra los intereses de les nueses comarque mineras y d’Asturies, que son más propios d’unes sociedaes bananeres que d’unes sociedaees series basaes na certeza del valor de los acuerdos firmaos, sobre manera ente alministraciones públiques”, añade’l voceru del Bloque, que califica los fechos como un “atentáu a los intereses socioeconómicos de les conceyos mineros y pon n’entredichu al propiu Gobiernu asturianu que, nun hai qu’escaecer, ye firmante, xunto a los ayuntamientos mineros, de munchos de los convenios roblaos para realizar los proyeutos afectaos”.