El Bloque por Asturies esíxe-y a Migoya que rectifique

Énte les declaraciones de la conseyera de Cultura, Ana Rosa Migoya, que defendió al RIDEA na so postura de nun almitir ponencies en llingua asturiana nel "Congresu d'Estudios asturianos", interpretando la conseyera que la institución nun taba valtando llei nenguna, el Bloque por Asturies emitió un comunicáu en que diz que considera "mui graves" les declaraciones d'Ana Rosa Migoya, acusándola d'asitiase "al marxe de la llei al defender un actu lleváu a cabu por un organismu públicu como'l RIDEA, qu'incumple con ello la Llei d'Usu y Promoción del Asturianu.

Nun comunicáu en que califica de "reaccionariu" al RIDEA, la organización política, tercer miembru del pautu de gobiernu asturianu, esixe por ello "la rectificación pública inmediata de la conseyera" en cuantes que ye la so obligación "respetar la llei y los alcuerdos del gobiernu al que pertenez y facer qu'estos se cumplan". Casu de nun rectificar la conseyera, el Bloque encamiénta-y al Presidente asturianu qu'intervenga llamando al orde a la conseyera.