El Bloque por Asturies diz que nun va firmar una reforma ensin oficialidá

El Bloque por Asturies presentó esta mañana les sos esixencies y puntos de partida nel procesu de reforma estatutaria. El reconocimientu de la capacidá política plena d´Asturies, de la identidá colectiva del país y la oficialidá de la llingua Asturiana, l'ampliación de les competencies esclusives, de desarrollu llexislativu y d´execución, reforzando la entidá política y institucional d´Asturies y la del sistema de financiación van ser los cuatro puntos básicos nos que s'articule la propuesta del grupu políticu que representaron güei Rafel Palacios y Roberto Colunga, que va defender una propuesta que garantice la suficiencia financiera d´Asturies, la solidaridá ente les Comunidaes del Estáu y la de la Unión Europea, neto que la sanidá y educación publiques y el derechu a vivir y trabayar n´Asturies

El Bloque parte de qu'Asturies ta enfrentándose y va enfrentase nos prósimos años a desafíos importantes pal so futuru como son la financiación autonómica y del sistema sanitariu, la mengua de los fondos europeos, el Plan de la Minería y la mesma Reforma Estatutaria, procesos que'l Bloque calificó de "desafíos fundamentales pal nuestru país" qu'han tratase dende un gobiernu "con una mayoría parlamentaria clara" que s'abra'l debate a tolos sectores "col oxetivu d´algamar grandes consensos y nun escluir a naide de decisiones claves pal nuestru futuru".

Esos procesos clave p'Asturies atalántalos tamién el mesmu Bloque por Asturies (BA) como un momentu clave pal futuru de la opción política que representa la organización. La llealtá al pautu de gobiernu, a los sos votantes y la defensa de les sos idees "ensin renunciar a nada" son los principios polos que va mandase la organización nel procesu negociador, anque'l BA fexo una alvertencia a cualquier hipotéticu compañeru de viaxe en cuantes que nun va participar "en dengún gobiernu, coalición electoral o alcuerdu políticu permanente o coyuntural, con denguna fuerza política que vote a favor o apoye una Reforma Estatutaria que nun reconoza los derechos políticos, económicos, sociales, culturales y llingüísticos que-y corresponden a Asturies, ente ellos, la Oficialidá de la Llingua Asturiana y del Gallego-Asturianu nel so territoriu".

El BA parte de la base de que'l procesu de creación de l'autonomía asturiana restrinxose nos venti años últimos a "un fechu básicamente alministrativu" negándose-y al país los sos derechos políticos, económicos, llingüísticos, institucionales o competenciales, "rescamplando l´ausencia d´una voluntá y un proyectu políticu articuláu p´Asturies" un modelu que pal BA ta yá quedando escosu, más tres de la reforma estatutaria de 1998 que foi "discriminatoria y desigual p´Asturies, negando´l nuestru derechu a un autogobiernu plenu y llendando la nuestra capacidá d´iniciativa política".

El Bloque quier que d'esa visión del autogobiernu asturianu participen les demás fuerces refiriéndose a ello como una "idea estratéxica pa toles fuerces polítiques asturianes, non sólo porque tou pueblu tien derechu a constituyise como comunidá política, sinon tamién porque la vertebración d´Asturies, la superación del desmantelamientu económicu, les propuestes de tresformación y la defensa de la so identidá necesiten un poder políticu democráticu que les articule".

La visión de conxuntu del procesu de reforma estatutaria ha derivar pal Bloque nun refuerzu de les llibertaes y derechos sociales, siendo'l de la reforma estatutaria un pasu más "nun procesu con una dimensión territorial, económica y ambiental, col oxetivu de construyir modelos de desarrollu sostenibles qu´equilibren el conxuntu d´Asturies y los sos conceyos" y que "ha garantizar la participación y´l protagonismu social, rexenerar el sistema democráticu y reconocer la rialidá nacional, llingüística y cultural d´Asturies, xunto col nuestru lexítimu derechu a escoyer llíbremente´l nuestru futuru colectivu como Pueblu".