El Bloque por Asturies desvincúlase de los actos gubernamentales del Día d’Asturies

La organización Bloque por Asturies mostró nun comunicáu la so sorpresa pola ausencia de la llingua asturiana nos cartafueyos - folletos- y nos testos publicaos con motivu de la celebración oficial del Día d’Asturies pela parte del Gobiernu del Principáu.



El Bloque considera qu'esti fechu vulnera l’alcuerdu de gobiernu IU-BA-PSOE sobre la defensa y protección oficial del asturianu. Amás d’escaecer la llexislación vixente nel Estatutu d’Autonomía, Lleí d’Usu del Asturianu y n’otros testos xurídicos del ámbitu de la protección mundial y europea de les llingües minoritaries. Esta ausencia del asturianu venla tovía menos xusticable nuna fecha tan significativa p’Asturies y ven “prindáu” y sumíu, pela parte más numberosa del Gobiernu, un trabayu nel que tán enfotaos.



Poro, el Bloque por Asturies desmárcase, puntualmente, d’esta actitú del Gobiernu de tolos asturianos y asturianes y esixe al mesmu la so rectificación inmediata, pa lo que la primer midida que s’escueye ye la de desvincular a los miembros del Bloque por Asturies que desempeñen cargos oficiales nel Gobiernu asturianu de los actos gubernamentales del Día d’Asturies. Esta midida va tar acompañada d’otres protestes públiques que s’anunciarán nos próximos díes.