El Bloque pide a Trevín qu’impida una concentración "xenófoba"

El BA pidió a la Delegación del Gobiernu español n'Asturies qu'actúe inmediatamente contra una concentración de la estrema derecha delantre del Centru Maternu Infantil. L’oxetivu ye parar el mensaxe d’odiu contra la inmigración.

Nuna nota prensa, señaló que "otra vez más la estrema derecha apunta contra los inmigrantes col so discursu demagogu y oportunista col fin de criminalizar a esti sector de la población, como si fueren los culpables de tolos males que pasen n'Asturies y n'Europa".

Detrás d'esta estratexa escóndese", según el Bloque, "la necesidá de confundir a la población y que nun se sepa quién son de verdá los culpables de la crisis, y quienes les víctimes independientemente de la nacionalidá".
  
Pa la organización "l'oportunismu xenófobu d'estos grupos d'estrema derecha, como Democracia Nacional, aprovecha'l discursu de confusión y falsa criminalización de los inmigrantes, qu'organizaciones polítiques como'l Partido Popular faen por meter nos debates sociales, económicos y políticos".
  
Carlos Palomino
Recuerda amás la nota que "hai tres años en Madrid, enantes d'una concentración de Democracia Nacional un militar profesional asesinó a Carlos Palomino y ta condenáu a más de venti años de carcel". "Por desgracia esta nun ye la escepción y munchos de los miembros d'esti partíu fueron condenaos pola xusticia por agresiones", acaba'l comunicáu.