El Bloque llamenta que 2010 “debilitara la democracia n’Asturies”

El voceru nacional del Bloque por Asturies (BA), Rafael Palacios, llamenta qu'en 2010 s’aprobaran na Xunta Xeneral del Principáu trés lleis "que nos roben la cartera y debiliten gravemente la democracia n'Asturies".

D'esta miente refirióse, en declaraciones a Europa Press, a l'aprobación de la Llei de Presupuestos y la Llei d'Acompañamientu pal añu 2011 que "arrenuncien a encarar la crisis dende la esquierda"; y l'aprobación de la Llei de Cambéu de la Función Pública que significa "frayar sentencies xudiciales" y "enllargar la inseguridá xurídica". 
  
Amás, no que se refier a la mesma formación política, Palacios resalta que 2010 "bien importante" pal BA, yá que "creció y fortalecióse a lo llargo d’esti añu".
  
"En 2010 el Bloque por Asturies decidió abandonar la coalición de Gobiernu n’Asturies por causa de la aprobación per parte de los sos socios naquel momentu, PSOE ya IX-Verdes, de la llamada 'Llei d'Axuste' que retaya sueldos, empleos y polítiques sociales poniendo en peligru'l futuru de Asturies", resalta.
  
Coles mesmes, incide na so constitución como Grupu Parlamentariu propiu pa "poder d'esta forma siguir defendiendo los sos compromisos electorales y ser la voz de les persones ensin voz, ser la voz de los asturianos y asturianes que nun se sienten representaos polos partíos del réxime, polos partíos tradicionales".
  
Pa Rafael Palacios, el 2010 despidióse “cola reforma llaboral, la reforma de les pensiones, la medría de la edá de xubilación y el robu que significa l'aumentu del preciu de la eletricidá, abre pasu a un añu 2011 de grandes retos pal Bloque por Asturies".
 
Pal 2011
Por eso, el voceru nacional del Bloque por Asturies sostién que la formación va trabayar en 2011 pa "siguir defendiendo nel Parlamentu asturianu a les persones que nestos momentos de pergrave crisis nun tienen voz, tán abandonaes polos partíos del réxime y obligaes a ser los paganinis d'una crisis de la que nun son responsables y que, amás de pagala y soportala, tienen que financiala viendo como se-yos roben derechos que costó munchos años de llucha y sacrificios consiguir".
  
Igualmente, BA va presentase nes elecciones de mayu de 2011 con "una propuesta electoral que dexe ventilar y anovar la política d’Asturies, daqué tan necesariu dempués de 30 años de ver les mesmes cares, les mesmes propuestes cansaes y escoses, que yá nun apurren nada a la solución de los problemes de Asturies".
  
"El Bloque por Asturies va lluchar por que nel añu 2011, los asturianos y asturianes recuperemos la ilusión y l'enfotu nun futuru dignu pa Asturies, nun futuru pa poder vivir y trabayar na nuesa tierra", acabó Rafael Palacios.