El Bloque llama a movilizase na manifestación de Xixón

Bloque por Asturies tamién va tar presente na manifestación convocada por CSI, SUATEA, SF y CGT contra los recortes y la reforma llaboral. Pa los nacionalistes hai que movilizase pa “recuperar les llaves del futuru d’Asturies”.

“¿Vas aguantar otra vuelta de tuerca?” ye’l lema col que los sindicatos CSI, SF, SUATEA y CGT van percorrer les cais de Xixón, el próximu 1 d’avientu a les 19.30, nuna manifestación contra los recortes, la privatización de la sanidá, la reforma llaboral y la llei d’estranxería.

Pal Bloque por Asturies los ciudadanos y ciudadanes nun pueden “aguantar otra vuelta de tuerca de los Gobiernos d’España y d’Asturies” y consideren qu’hai que responder a la “triste realidá que pon en peligru un futuru dignu y que condena a la esclusión, al paru y a la emigración”.

“Tenemos que dar una respuesta democrática que contraponga al silenciu y a la resignación la esperanza d’un futuru meyor y la fuerza de la unidá pa facelo realidá”, señala’l BA en nota de prensa. Amás, la formación asturianista recuerda qu’hai casi 100.000 paraos n’Asturies, y que tán en paro más del 50% de la mocedá y del 35% de les muyeres.
 
“Conciertacción”
Per otru llau, mientres el percorríu de la manifestación, los grupos asturianos de hiphop reivindicativu K-Nalón y Arma X van dar un conciertu enriba d’ún camión sonorizáu qu’acompañará’l camín de los manifestantes.