El Bloque acusa a Blanco de mentir y faltar al respetu a los asturianos

El Bloque por Asturies calificó de “mentires intolerables” les declaraciones del ministru de Fomentu, José Blanco, mientres l'actu d'inauguración de l'ampliación d'El Musel. Criticaron que la so actitú foi de “falta de respetu a Asturies”.

"Namás mos visita pa faltamos, faltar la nuesa intelixencia y intentar dar cobertoria a la campaña electoral socialista col dineru de los ciudadanos y ‘patriotismu del bonu’ del PSOE consiste en sobrecostos, recortes, despreciu y burla permanente a Asturies, y a los asturianos”, argumentó’l Bloque.
  
Pa BA los permanentes anuncios de Blanco nun son más que cortines de fumu pa esconder la verdadera realidá, que nun ye otra que "la so falta de compromisu con Asturies, los sos engaños permanentes, la so nula voluntá de concretar un calendariu definitivu y la so vergonzosa actitú poniendo per delantre de los intereses de los ciudadanos los intereses electorales del PSOE, que ta dispuestu a sacrificar el futuru de Asturies y les sos infraestructures, pa siguir sobreviviendo nel desgobiernu".
  
Respuesta
Por ello Bloque por Asturies esixe una respuesta inmediata y contundente a les permanentes agresiones contra Asturies del Gobiernu de Madrid y denuncia la incapacidá del Gobiernu del Principáu pa defender los derechos de los asturianos ante'l Gobiernu de Madrid.