El banjo d'Ángel Ruíz gana un concursu internacional de composición

Esti músicu asitiáu n'Asturies ta acabante de ganar el "Internacional Songwriting Competition 2004", un importante premiu internacional de composición. Ángel Ruiz ye un músicu nacíu en Galicia, concretamente en O Barco de Valdeorras, pero que dende va munchos años vive en Xixón. El so interés por esti instrumentu tan particular, el banjo, nació va trece años cuando lu sintió per primer vegada en Madrid, y partir d'esi momentu la so vida xiró alredor de les cinco cuerdes. Col tiempu y con años d'estudiu, Ángel Ruiz fue quien a algamar una perbona técnica, y dominar dellos estilos como'l rock, blues, bluegrass o el folk nos que'l banjo ye un instrumentu de referencia. Esti dominiu llevólu por exemplu a collaborar nel discu de "Lliberdón" "Tamos Fartos", pa más tarde entrar a forma parte del grupu "Skitarna", col que grabaría un discu.

Ángel Ruiz taba presente na categoría instrumental del "Internacional Songwriting Competition 2004",col tema "Banjo Blues", nel qu'optaba a un premiu de 10.000 dólares n'efectivo y 30.000 dólares en mercancía, a los que se fizo acreedor ayeri. Tien especial méritu esti premiu tres comprobar que los más de los participantes nesti concursu son americanos, ente los que la presencia d'Ángel paecía casi una intromisión qu'a la fin llegó a lo más alto.
Pa sentir el cantar col que ganó'l concursu namás qu'hai calcar equí, y sentir esi banjo "made in Asturies".