El "bable" va volver a ser "llingua asturiana"

La propuesta de currícula nuevos pal cursu llectivu 2.004-2.005 desanicia la denominación "bable-asturiano" pa l'asignatura de llingua asturiana. El documentu ta pendiente de pasar per Conseyu Escolar y aprebase definitivamente en Conseyu de Gobiernu.

La polémica denominación "bable-asturiano" que se-y da a l'asignatura d'asturianu nos currícula vixentes anguaño podría desapaecer nos currícula nuevos, nos que se contempla a l'asignatura como "llingua asturiana y lliteratura". Asina lo espeya la propuesta curricular de la Conseyería d'Educación. El documentu que propón el departamentu de Riopedre tien de pasar agora en primer instancia a Conseyu Escolar, órganu en que tan representaos los sindicatos d'enseñanza y l'alministración, y dempués aprebase definitivamente en Conseyu de Gobiernu.

Según fontes de Conseyería d'Educación, esti procesu va ser rápidu y lo más fácil ye que l'aprobación definitiva venga nel últimu conseyu de gobiernu que se fai la primer selmana d'agostu enantes del parada vacacional.

Foi precisamente en Conseyu de Gobiernu onde se tracamundió n'anterior llexislatura la denominación de "llingua asturiana" pola de "bable-asturiano" una decisión que sindicatos y Academia de la Llingua condenaron duramente y que dio llugar a protestes y movilizaciones del profesoráu, anque nun paez qu'esta vegada vaya pasar lo mesmo.

Lo que nun cambia ye l'estatus de l'asignatura, que va siguir siendo optativa en cuenta de voluntaria, otra de les aspiraciones de los sindicatos d'enseñanza y de l'Alla.

A la entruga d'Asturies.com sobre esta anuncia, la Presidenta de l'Academia de la Llingua, Ana Cano, prefirió esperar a que s'apreben los currícula pa dar una valoración definitiva, anque de mano reconoció que ye un pasu alantre'l que les coses vuelvan a tar como enantes y que s'igüe "un conflictu creáu pola alministración". Sicasí, la presidenta de l'Alla, que declaró que la institución taba al tantu del procesu de redacción de los currícula, llamentó qu'estos van yá con retrasu sobre'l calandariu previstu.