El BA propón la creación d’una unidá d’E.L.A nel HUCA

El diputáu del Bloque por Asturies, Roberto Colunga, presentó una proposición non de llei pa que se cree una Unidá d’Esclerosis Llateral Amiotrófica (E.L.A) nel HUCA, pola mor de qu’Asturies ye la comunidá que más sufre la enfermedá.

La E.L.A ye una enfermedá neuorodexenerativa que nun tien un tratamientu curativu, como’l parkinson, l’alzheimer y la esclerosis múltiple. Esta enfermedá, que n’Asturies tien una incidencia de 1’5 por cada 10.000 habitantes – la mayor del Estáu- afecta’l sistema nerviosu central y caracterízase pol fallu de les motoneurones.

Pa la formación nacionalista, l’atención de los enferemos d’esta enfermedá ta suxeta n’Asturies al “voluntarismu desinteresáu de los profesionales” y munchos afectaos deciden iniciar el so tratamientu fuera de la comunidá, colos pilancos de pérdida de calidá de vida y recursos económicos.
  
Preguntes a Mediu Ambiente
Otramiente, el diputáu del BA, Roberto colunga, tamién presentó nel rexistru de la Xunta Xeneral varies preguntes empobinaes al conseyeru de Mediu Ambiente, Francisco González Buendía, en rellación a les balses de residuos tóxicos existentes n’Asturies.

Los asturianistes quieren conocer el númberu de balses de residuos tóxicos existentes n’Asturies y cuál ye la so ubicación xeográfica exacta. Al empar, piden saber tamién cuántes d’eses balses s’asitien en pendientes o próximes a cauces de ríos.